یہ وہ روضہ ہے جہاں دل نہیں توڑے جاتے

 سوئے طیبہ یہ سمجھ کر ہیں زمانے جاتے

یہ وہ روضہ ہے جہاں دل نہیں توڑے جاتے

بھول جاتے تھے صحابہ غم و الام اپنے
دیکھ لیتے تھے جو سرکار کو آتے جاتے

یہ ہے آقاﷺ کی عنایت وہ کرم کرتے ہیں
ورنہ ہم جیسے کہاں در پے بلائے جاتے

ان کے کردار کا قد ناپ رہی ہے دنیا
جن کے دیوانوں کے قد تک نہیں ناپے جاتے

کوئی سرکار کو سر تا بقدم کیا دیکھے
پائے اقدس بھی برابر نہیں دیکھے جاتے

نور کی حد میں فقط نور ہی جا سکتا ہے
صرف اگر ہوتے بشرتو عرش پہ کیسے جاتے

جسم کے ساتھ اٹھائے گئے جب کہ عیسیٰ
نورِ گُل کیوں نہ شبِ اسریٰ بدن سے جاتے

چشمِ باطن سے مدینے کے نظارے دیکھو 
صرف آنکھوں سے یہ منظر نہیں دیکھے جاتے