ماہ رمضان بس الوداع ہے

الوداع الوداع الوداع ہے
ماہ رمضان بس الوداع ہے

دن تیرے آنے سے معتبر تھے نور میں ڈوبے شام و سحر تھے
تیرے جانے سے دل رو رہا ہے ماہ رمضان بس الوداع ہے

الوداع الوادع الوداع ہے
ماہ رمضان بس الوداع ہے

رحمتوں کا تُو پیغام لایا برکتوں کا امکان لایا
رتبہ اعلی و افضل تیرا ہے ماہِ رمضان بس الوداع ہے

جام رحمت کے تُو نے پلاۓ گُل مرادوں کے تُو نے گھلاۓ
تُو جدا ہم سے اب ہو رہا ہے ماہِ رمضان بس الوداع ہے

الوداع الوداع الوداع ہے
ماہِ رمضان بس الوداع ہے

چل دیا تُو جو رب کی جانب اہلِ ایماں کے پُر نم ہیں قالب
قلب عشرت بھی غم سے بھرا ہے ماہِ رمضان بس الوداع ہے

الوداع الوداع الوداع ہے
ماہِ رمضان بس الوداع ہے

 

عطار کی ہمت کا کیا کہنا

امیر اہلسنت آپ کی ہمت کا کیا کہنا

جو بد کو نیک کر دیتی ہے اس دعوت کا کیا کہنا

جو صحبت میں تیری آئے وہ عشق مصطفی پائے
میرے محسن تیری مجلس تیری صحبت کا کیا کہنا

یہاں پر ایک شمع دل سے لاکھوں دیپ جلتے ہیں
ضیائی قادری درویش کی برکت کا کیا کہنا

مساجد سے نکل کر بستیوں تک خیر پہنچانا
جزاک اللہ تیری غم خوار کی عادت کا کیا کہنا

شعور و علم و آگاہی ملے جس سے مسلماں کو
تیرے پیارے نظامِ علم اور حکمت کا کیا کہنا

جسے تم پیار سے دیکھو تمہارا دل سے شیدا ہو
محبت بانٹنے والی تیری فطرت کا کیا کہنا

ضیائی قادری فیضان بٹتا ہے تیرے در سے
نبی کے عشق میں سرمست جمیعت کا کیا کہنا

شفیع المذنبیں تک تیرا شجرہ لاکھوں کو لایا
نبی سے جوڑ دینے والی اس نسبت کا کیا کہنا

جہاں میں بانٹے والے بہت کچھ بانٹ دیتے ہیں
جو دولت تو نے بانٹی ہے تیری دولت کا کیا کہنا

جہاں شمع محبت پائی پروانہ سجا پہنچا
فقیرِ بدر تیری واہ تیری عادت و خصلت کیا کہنا

 

مدینے سے بلاوا آرہا ہے

میرا دل مجھ سے پہلے جارہا ہے

شبِ فرقت سے دل گھبرا رہا ہے
مدینہ آپ کا یاد آرہا ہے

یہاں مرضی نہیں چلتی کسی کی
مدینے والا ہی بلوا رہا ہے

عجب ہیں سبز گنبد کے نظارے
نگاہوں کو خدا یاد آرہا ہے

نواسوں کا وہ صدقہ بانٹتے ہیں
زمانہ اُن کا صدقہ کھا رہا ہے

میرا دل بھی تو اپنے ساتھ لے جا
اکیلا کیوں مدینے جارہا ہے

بلائیں گے تجھے بھی سرورِ دین
دلِ محمود تو کیوں گھبرا رہا ہے

*معـزز احبــاب!*

🍃ثـواب حـاصـل کـرنـے کـی نـیـت سـے 
  زیـادہ سـے زیـادہ شــئـیـر کیجیئے🍃

 

میرا دل اور میری جان مدینے والے

 میرا دل

میرا دل اور میری جان مدینے والے

تجھ پہ سو جان سے قربان مدینے والے

لکھ دے لکھ دے میری قسمت میں مدینہ لکھ دے
ہے تیری مِلک قلم دان مدینے والے

پھر تمنائے زیارت نے کیا دل بے چین
پھر مدینے کا ہے ارمان مدینے والے

سبز گنبد کی فضاؤں میں بلالو مجھ آقاﷺ
تیرا غافل ہے پریشان مدینے والے

کام آتی ہے تیری ذات ہر اک دکھیا کے
میری مشکل بھی ہو آسان مدینے والے

سگ طیبہ مجھے سب کہہ کے پکارے بیدم
یہی رکھے میری پہچان مدینے والے

بے خود کیے دیتے ہیں

بے خُود کِیے دیتے ہیں اَندازِ حِجَابَانَہ

آ دِل میں تُجھے رکھ لُوں اے جلوہ جَانَانَہ

کِیوں آنکھ مِلائی تِھی کیوں آگ لگائی تِھی
اب رُخ کو چُھپا بیٹھے کر کے مُجھے دِیوانہ

اِتنا تو کرم کرنا اے چِشمِ کریمانہ
جب جان لبوں پر ہو تُم سامنے آ جانا

اب موت کی سختِی تو برداشت نہیں ہوتِی
تُم سامنے آ بیٹھو دم نِکلے گا آسانہ

دُنیا میں مُجھے اپنا جو تُم نے بنایا ہے
محشر میں بِھِی کہہ دینا یہ ہے مرا دیوانہ

جاناں تُجھے مِلنے کی تدبِیر یہ سوچِی ہے
ہم دِل میں بنا لیں گے چھوٹا سا صنم خانہ

میں ہوش حواس اپنے اِس بات پہ کھو بیٹھا
تُو نے جو کہا ہنس کے یہ ہے میرا دیوانہ

پینے کو تو پِی لُوں گا پر عَرض ذرّا سی ہے
اجمیر کا ساقِی ہو بغداد کا میخانہ

کیا لُطف ہو محشر میں شِکوے میں کیے جاوں
وہ ہنس کے یہ فرمائیں دیوانہ ہے دیوانہ

جِی چاہتا ہے تحفے میں بھِیجُوں اُنہیں آنکھیں
درشن کا تو درشن ہو نذرانے کا نذرانَہ

محشر میں میرے مُرشِد تم پاس کھڑے رہنا
کیا جانے خدا پوچھے کیا کہہ دے یہ دیوانہ

معلوم نہیں بیدم میں کون ہوں اور کیا ہوں
یوں اپنوں میں اپنا ہوں بیگانوں میں بیگانہ

بیدمؔ میری قِسمت میں سجدے ہیں اُسِی دّر کے
چُھوٹا ہے نہ چُھوٹے گا سنگِ درِّ جَانَانَہ

 

یا رسول اللہ انظر حالنا

مصطفیٰﷺ نظرِ کرم فرمائیں گے

ایک دن ہم بھی مدینے جائیں گے

سبز گنبد پر نظر جب جائے گی
کام سب بگڑے ہوئے بن جائیں گے

گنبدِ خضریٰ کی ٹھنڈک پائیں گے
ہم بھی اُسکے سائے میں سو جائیں گے

شبر و شبیر جانِ فاطمہ
اپنے نانا سے ہمیں ملوائیں گے

شبر و شبیر کے نانا ہیں وہ
وہ ہمیں خالی نہیں لوٹائیں گے

جاگ اٹھے گی تیری قسمت اے علؔیم
جب قدم ان کے تیرے گھر آئیں گے

 

Rab Ka Mehman Ramzan Hai

السلام اے ماہِ رمضان السلام اے ماہِ رمضان

میرے آقا کا فرمان ہے رب کا مہمان رمضان ہے

سحری افطار کی چاشنی اور تراویح کی دلکشی
تجھکو بن مانگے جو مل گئی تجھ پہ رب کا یہ احسان ہے

جس میں قرآن نازل ہوا قرب رحمان حاصل ہوا
ذکر سے دل نہ غافل ہوا یہ وہی ماہِ رمضان ہے

کر تلاوتِ تو قرآن کی قدر کر رب کے فرمان کی
تاکہ رحمت ہو رحمن کی بس یہی تیری پہچان ہے

راہِ قرآن و سنت پہ چل تاکہ حاصل ہو جنت کے پھل
نفس و شیطاں ہے دشمن سنبھل تیرا غافل کدھر دھیان ہے

 

آمد رمضان

چاروں طرف ہے روشنی رمضان کی آمد ہوئی
کھلنے لگی دل کی کلی رمضان کی آمد ہوئی

دنیا کے پیچھے مت پڑو روزے رکھو مسجد چلو
کرتے رہو ذکر نبی ﷺ رمضان کی آمد ہوئی

جو مانگنا ہے مانگ لو رحمت خدا کے لوٹ لو
ہوگی دعا پوری سبھی رمضان کی آمد ہوئی

ماں باپ کی عزت کرو ان سے دعائیں خوب لو
اس میں ہے آقاﷺ کی خوشی رمضان کی آمد ہوئی

افطار و سحری کا مزہ فضل خدا سے ہے ملا
مولا نے دی پھر یہ خوشی رمضان کی آمد ہوئی

پھیلا عجب رنگ کے وفا ہر سمت رحمت کی فضا
ہر لب پے ہے یہ نغمگی رمضان کی آمد ہوئی

یا رب دعا مقبول ہو آقاﷺ کو بھی منظور ہو
تفؔسیر کی یہ شاعری رمضان کی آمد ہوئی