سانس تو آنی جانی ہے

میں بھی فانی تو بھی فانی دنیا ساری فانی ہے

سانس پہ مت اترا رے بندے سانس تو آنی جانی ہے

چھوڑ دے سارے کالے دھندے توڑ دے سب شیطانی پھندے
دو روٹی کی سوچ رے بندے دو ہی تونے کھانی ہے

حسن جوانی دولت شہرت عزت طاقت اور مزہ
کبھی نہ ان کے دام میں آنا ٹھنڈی لحد جو پانی ہے

کتنے آئے کون بچا ہے کیسے تو بچ پائے گا
اس بابت تو سب یکساں ہے سب کی ایک کہانی ہے

گو کہ بظاہر گل سی خوشی ہے خار سے غم ہیں دنیا میں
لیکن نَفْسُ الْأَمر میں سب کی ایک حقیقت پانی ہے

میرے جسم پہ میری مرضی کیسی یہ نادانی ہے
راہِ خدا سے ہٹ کر تونے خود پر آفت ڈھانی ہے

نا تو خود دنیا میں آیا نہ ہی خود سے جائے گا
چھوڑ دے دو پل کی من مانی آگے دیکھا جائے گا

 

یہ دنیا ہماری تو بس اک سفر ہے

سفر کرنے والوں کی منزل قبر ہے

بظاہر تو مٹی ہے مدفن ہمارا
مگر نار یا نور ہی ہے سراپا
عمل پر ہے ہمارے قبر کا نقشہ
ہے جنت کی کھڑکی یا بچھو کا گھر ہے

غضب سے ہے زیادہ میرے رب کی رحمت
مگر اپنے دل میں نہیں خوف و عبرت
کبھی نیکیوں میں نہیں کرتے سبقت
گناہوں کی عادت ہمیں کس قدر ہے

اندھیروں میں بھٹکی ہے یوں میری ہستی
گناہوں میں لذت عبادت میں سستی
ختم کر دے مولا میری سیاہ بختی
تو ہی رہنما اور تو ہی چارہ گر ہے

تہجد اور اذکار سے روح تر ہو
تلاوت سے روشن یہ شام و سحر ہو
نہ تاریک شب کا ہمیں کوئی ڈر ہو
چراغِ محبت جو دل میں اگر ہے

بھڑکتی ہوئی آگ کو دور کر دے
میرے مولا میری قبر نور کر دے
میرے دل میں روشن وہی طور کر دے
میری روح جس کے لئے منتظر ہے

وقتِ آخر حضور آجانا

وقت آخر حضور ﷺ آجانا

اپنا جلوہ مجھے دیکھا جانا

میرے مدفن میں روشنی کے لیے
آکے ایک بار مسکرا جانا

ایک مدت سے پیاسی ہیں آنکھیں
جامِ دیدار انہیں پِلا جانا

دم میرا تیرے روبرو نکلے
حسرتِ دل میری مٹا جانا

عرض کر دینا میرا اُن سے سلام
جب مدینے میں اے صبا جانا

تیری فُرقت میں کب تلک جھیلوں
درد کی میرے کر دوا جانا

لوگ کہتے ہیں میرا کوئی نہیں
آپ ﷺ میرے ہیں یہ بتا جانا

اے طبیبو میری شفا کے لئے
ذکر انﷺ کا مجھے سنا جانا

لاکے تشریف خوابِ احمؔد میں
اپنی چادر بھی کر عطا جانا

 

نبی کے پائے اقدس سے

نبیﷺ کے پائے اقدس سے ہے مجھ کو رابطہ رکھنا

فرشتو! سنگ اسود تک لحد میں راستہ رکھنا

مکاں میں رہ کے سیرِ لامکاں کرنے کی خواہش ہے
تو در ہی در کھلیں گے ایک در سے واسطہ رکھنا

لٹا کر قبر میں جب خاک مجھ پر ڈال دی جائے
تو کتبے کی جگہ ٹوٹا ہوا اک آئینہ رکھنا

شہیدان محبت کے لیے یہ رزق کافی ہے
درودوں کا، سلاموں کا زباں پر ذائقہ رکھنا

علیحدہ ہو کے بھی ملتی رہے گی زندگی تم سے
مظفر موت سے پہلے تم اس کا تجربہ رکھنا

 

عید کا دن آگیا

ہر سو رب کی چھائی رحمت عید کا دن آگیا

ہوگیا رمضان رخصت عید کا دن آگیا

جس نے روزے رکھےرمضاں میں، ہوا وہ نور بار
اس کے رخ پر آئی زینت عید کا دن آ گیا

سب کو سینے سے لگائو اور مٹا دو قلب سے
آج ہر بغض و کدورت عید کا دن آگیا

اپنے اپنے گھرمیں دعوت رکھ کے موقع ہے سنو
کرلو اک دوجے کی خدمت عید کا دن آگیا

پورے رمضاں میں عبادت کی جو اُسکی پائنگے
آج اپنے رب سے اجرت‌ عید کا دن آگیا

ہو مبارک چاند میری نظروں کو آیا نظر
اے حبیب رب کی‌ امت عید کا دن آگیا

پہلی فرصت میں اے یارو ! بےکس و مجبور کی
کیجیے پوری ضرورت عید کا دن آگیا

عید کےصدقے میں نازاؔں رب سے بخشش چاہ لو
ہے بڑا موقع غنیمت عید کا دن آگیا